2024-06-19

საფრანგეთის მონაცემთა დაცვის საზედამხედველო ორგანომ (“CNIL”) ჯანმრთელობასთან დაკავშირებული პერსონალური მონაცემების დამუშავების წესების თაობაზე რეკომენდაცია გამოაქვეყნა

2024 წლის 13 ივნისს, საფრანგეთის პერსონალურ მონაცემთა დაცვის საზედამხედველო ორგანომ (“CNIL”) გამოაქვეყნა რეკომენდაცია,[1] რომელიც ჯანმრთელობასთან დაკავშირებული პერსონალური მონაცემების დამუშავებას შეეხება. დოკუმენტში განხილულია მონაცემთა დაცვის საზედამხედველო ორგანოს წინასწარი ინფორმირების საკითხი ჯანმრთელობასთან დაკავშირებული პერსონალური მონაცემების დამუშავების შემთხვევაში. რეკომენდაციის მიზანია, ჯანმრთელობასთან დაკავშირებული პერსონალური მონაცემების დამუშავებისას, მონაცემთა სუბიექტების უფლებების ჯეროვანი დაცვა.

“CNIL”-მა ყურადღება გაამახვილა პერსონალურ მონაცემთა დაცვის აქტზე, რომლის ითვალისწინებს ჯანმრთელობასთან დაკავშირებული პერსონალური მონაცემების დამუშავების წესებს. კერძოდ, 65-ე მუხლის თანახმად, ჯანმრთელობის შესახებ პერსონალური მონაცემების დამუშავებისთვის საზედამხედველო ორგანოსგან წინასწარი ნებართვის მოპოვება არ არის საჭირო, თუ:

მონაცემთა სუბიექტმა განაცხადა მკაფიო თანხმობა ერთი ან რამდენიმე მიზნით მისი პერსონალური მონაცემის დამუშავების შესახებ;
მონაცემთა სუბიექტს არ აქვს თანხმობის გაცემის შესაძლებლობა და მონაცემების დამუშავება აუცილებელია მისი ან სხვა ფიზიკური პირის არსებითი ინტერესების დასაცავად;
მონაცემების დამუშავება აუცილებელია სამედიცინო დიაგნოზის დასმის, მკურნალობისა და ჯანდაცვის მიზნებისთვის.

“CNIL”-მა აღნიშნა, რომ ჯანმრთელობასთან დაკავშირებული მონაცემების დამუშავების პროცესის არსებითი ცვლილების შემთხვევაში, აუცილებელია ახალი მიდგომის გათვალისწინება. კერძოდ, „არსებით ცვლილებებში“ მოიაზრება მონაცემთა დამუშავების ახალი მიზნის არსებობა ან დამატებით, სხვა განსაკუთრებული კატეგორიის მონაცემების დამუშავება, რაც გამოქვეყნებული დოკუმენტის თანახმად, საჭიროებს მონაცემთა სუბიექტისგან ახალი თანხმობის მოპოვებას და მონაცემთა დაცვის საზედამხედველო ორგანოსგან ნებართვის მიღებას. იმ შემთხვევაში, თუ მონაცემების დამუშავება ხორციელდება “CNIL”-ის ნებართვის შემდგომ და მიმდინარე მონაცემთა დამუშავების პროცესი სცდება დამუშავების ფარგლებს, აუცილებელია ავტორიზაციის ხელახალი მოპოვება.

ჯანმრთელობასთან დაკავშირებული პერსონალური მონაცემების დამუშავების კონტექსტში არსებით ცვლილებებად მოიაზრება:

დამუშავებისთვის პასუხისმგებელი პირის ვინაობის შეცვლა ან თანადამუშავებაზე პასუხისმგებელი პირის დამატება;
ჯანმრთელობის შესახებ მონაცემთა მიმღებ ახალ პირთა არსებობა;
დამუშავების ახალი მიზანი;
ახალი კატეგორიის სენსიტიური მონაცემების დამუშავება;
მონაცემთა დამუშავება ახალი წყაროდან;
ახალი მონაცემების დაკავშირება მონაცემთა წყაროსთან;
დაინტერესებულ პირთა ოდენობის არსებითი ზრდა;
თავდაპირველ მიზანთან მიმართებით მონაცემთა სუბიექტების უფლებების შეზღუდვა;
მონაცემთა დამუშავებისა და შენახვის ვადების არსებითი გახანგრძლივება;
ტექნიკური და ორგანიზაციული ზომების მოდიფიკაცია, რომლებიც ასუსტებს მონაცემთა უსაფრთხოებას.