ლაგოდეხის დრამატულ და თოჯინების თეატრში საბავშვო სპექტაკლის ,,ზოგჯერ თქმითაც დაშავდების“ პრემიერა გაიმართა

სპექტაკლის პრემიერა ევროკავშირის, გაეროს განვითარების პროგრამისა და ლაგოდეხის მუნიციპალიტეტის ხელშეწყობით გამართული ახალგაზრდული ფესტივალის „ადამიანი & პლანეტა“ ფარგლებში შედგა. წარმოდგენას პერსონალურ მონაცემთა დაცვის სამსახურის უფროსის აპარატის ხელმძღვანელი - ნიკოლოზ პოპიაშვილი და სამსახურის საჯარო სექტორზე ზედამხედველობის დეპარტამენტის უფროსის მოადგილე - ლიკა კობალაძე ესწრებოდნენ.

რაც შეეხება სხვა აქტივობებს, ფესტივალი ,,ადამიანი & პლანეტა“ რამდენიმე ინტერაქციულ და საგანმანათლებლო ღონისძიებას ითვალისწინებდა, რომელშიც სკოლის მოსწავლეები იყვნენ ჩართულები.

პერსონალურ მონაცემთა დაცვის სამსახურის აპარატის ხელმძღვანელმა ფესტივალის ფარგლებში გამართულ ღონისძიებაზე, სტუმრებს მისასალმებელი სიტყვით მიმართა. ნიკოლოზ პოპიაშვილმა ყურადღება არასრულწლოვანთა პერსონალური დაცვისა და ამ მიმართულებით ცნობიერების ამაღლების მნიშვნელობაზე გაამახვილა.

ღონისძიებას ასევე ესწრებოდნენ: ბულგარეთის რესპუბლიკის ელჩი საქართველოში - ვესელინ ბეტროვ ვალკანოვი, ესპანეთის საქმეთა რწმუნებული საქართველოში - მარკოს გრანადოს გომესი, საქართველოს პრემიერ-მინისტრის მრჩეველი ადამიანის უფლებების საკითხებში, ნიკო თათულაშვილი და შერიგებისა და თანასწორობის საკითხებში სახელმწიფოს მინისტრის პირველი მოადგილე ლია გიგაური.